Mga polis sa Mandaue ilahugay

CEBU, Philippines - Ang mga polis nga nadestino sa unom ka mga police station nga ubos sa Mandaue City Police Office (MCPO) gikatakdang lahugayon unya sa Nobyimbre 10 niining tuiga.

Si MCPO Director Senior Supt. Noel Gillamac nga nahinabi sa Banat News kagahapon miingon nga ang tuyo sa maong lahugay   aron nga   makabaton sila og kasinatian sa lainlain nga kaakohan sa ilang trabaho.

Matud pa niya nga gihan-ay na niya ang ilang balhinan ug gipahibawo na silang daan niini aron dili sila makuratan sa pag-abot sa higayon. 

Si Gillamac miingon nga una na niyang gipatuman ang paglahugay sa mga hepe sa unom ka mga police station sa wala pa ang barangay ug Sangguniang Kabataan nga piniliay sa miaging Lunes.

Ang mao nilang distino sa miaging piniliay mahimo na nga permanente sanglit isunod man usab niya sa paglahugay ang mga sakop niini. (BANAT)