Sekyu nga armado ug hubog priso

CEBU, Philippines - Nagtingkagol sa Talisay City detention cell ang usa ka security guard kinsa giingong hubog ug nagdala og armas niadtong gabii sa adlaw sa barangay ug SK election didto sa barangay Lower Mohon, dakbayan sa Talisay.

Ang suspetsado mao si Barcemio Pejo, 41, residente sa nahisgutang lugar ug security guard nga ubos sa Maya Security Agency.

Ang Talisay City Police Station nakadawat og tawag gikan sa usa ka molupyo sa maong lugar kinsa nangayo og panabang sa mga polis tungod kay adunay giingong armadong tawo nga kalit lang mitungha sa ilang barangay.

Sila si PO2 Ivan Ray Juarez ug PO1 Jamal Kiri Camerino daling miresponde sa maong report.

Naabtan nila si Pejo nga hubog ug nasakmit nila gikan kaniya ang duha ka magazine sa kalibre .45 nga pistola ug napulo ka buhing bala sa maong armas.

Si Pejo gidala sa mga polis ug gibalhog dayon sa detention cell ug gipasakaan na og kaso nga may labot sa paglapas niya sa Comelec gun ban. (BANAT)