Gisaka sa balay gipatay

CEBU, Philippines - Patay diha-diha ang usa ka drayber sa habalhabal human gisaka sa iyang balay dayun gidul-itan og pusil sa ulo samtang kini nagkaon og panihapon diha sa sitio Kulo, barangay Kahumay-humayan siyudad sa Danao niadtong Lunes sa alas 8:30 sa gabii.

Ang biktima mao si Richard Tolo Ormoc, 29, molupyo sa nahisgutang lugar samtang wala pa mailhi sa kapolisan ang mamumuno sa biktima.

Matud pa ni SPO4 Jose Salingua Jr., sa Danao City Police Station dihang nahinabi sa Banat News mao pay pagpauli sa biktima gikan namasahero ug nagkaon og panihapon dihang misekreto og saka ang mamumuno dayun gidul-itan kini og pusil sa ulo usa ka higayun.

Human niini miambak pagawas ang gitahapan ug wala na maabti pa sa mga misusing mga silingan sa biktima.

Gisalikway sa kapulisan ang pagduda nga may kalambigitan sa piniliay ang nahitabo gumikan kay dili kandidato ang biktima ug gawas pa wala usab kini kandidato nga gisuportahan. - Darrel Carumba (BANAT NEWS)