Managsuon gidakdakan patay

CEBU, Philippines - Managsuong mga tiguwang ang napalgang patay sa kalibunan pasado alas-8 sa buntag sa miaging adlaw diha sa barangay Camburoy lungsod sa Samboan nga pulos gituohang gipangdakdakan og bato sa ilang mga ulo hangtud nga nangamatay.

Ang mga biktima nailhan nga sila, Marcelino Deniega, 74, ug Agustina Deniega, 54, puros molupyo sa sitio Paligason barangay Monteverde sa maong lungsod.

Nasayran nga ang kapitan sa barangay Camburoy, Edilberto Puyod, mao nay mipahibalo sa kapolisan sa maong lungsod nga aduna silay napalgang duha ka tawo nga nagbuy-od ug wala nay kinabuhi sa maong lugar.

Matud pa ni SPO1 Dominador Perolino nga base sa ilang nasayran nga impormasyon nga katapusang nakit-an ang managsuon nianang pagkabuntag ug gituohan nga aduna kini lakaw patubang sa lungsod.

Apan dako ang pagduda ni Perolino nga gi-pickup ang duruha ug didto na sa maong lugar gipamatay tungod sa mga nakitang daghang mga bun-og ug samad sa ilang mga ulo nga gituohang agi sa pagdakdak og bato. Gidudahan usab sa kapolisan karun ang pipila sa mga kabanay sa mga biktima nga posibleng adunay kalambigitan sa maong krimen sanglit ang kanhi kapitan sa ilang barangay nga si Cerilo Deniega diin gipatay gidudahang binuhatan ra gihapon sa ilang mga kabanay tungod sa panagbangi sa yuta. (BANATNEWS)