CEBU, Philippines - Sulod sa duha ka oras duha usab ka mga kandidato sa pagkakonsehal sa duha ka barangay sa San Remegio ang nalambigit sa duha ka insidente sa pagpamusil sa miaging gabii.
Pasado alas-7 sa miaging gabii sa barangay Luyang sa maong lungsod nahitabo usa ka Douglas Marianito Cabiao, 50, molupyo sa maong lugar nakaangkon og samad pinusilan sa iyang lukon-lukon nga bahin sa tiil.
Samtang ang gitumbok nga suspetsado mao ang kandidato sa pagkakonsehal sa maong barangay si Kim “Mik-mik” Sanchez, 33, kinsa giingong gisuportahan ni Cabiao.
Sa pakighinabi sa Banat News sa hepe sa kapolisan sa lungsod sa San Remegio, Chief Insp. Jose Rovic Villarin mibutyag nga base sa ilang nakuhang impormasyon miduaw sa panimalay sa biktima ang suspek aron kini hangyuong pabotaron ‘straight’ ang sakop sa pamilya niini.
Apan ang biktima mihangyo ngadto sa suspetsado nga tungod kay nakasaad usab siya sa pikas nga partido bahinon nalang nila ang ilang botaran.
Gikatahong gikasuko kini sa suspetsado ug giingong maoy hinungdan sa pagpamusil niini ug gidala sa tambalanan ang biktima apan nakaikyas ang suspek.
Duha ka oras ang milabay pasado alas-9 sa miaging gabii sa barangay Bagtik usa ka kandidato sa pagka-kagawad ang napusilan nga giilang si Renato Pacto Logera, ilawom sa lineup sa incumbent nga barangay kapitan.
Si Logera naigo sa walang bahin sa tiil samtang ang suspetsado nga gitumbok mao si Madison Aton uban sa laing duha ka wala mailhing lalaki.
Matud pa ni Villarin nagmaneho ang biktima sa iyang sakyanan padulong sa sitio Dita dihang gipara sa tulo ka tawo lakip na niini si Aton dayon kalit nga pusil kaniya sa tiil.
Gibutyag sa biktima nga suporter sa kaatbang sa ilang lineup si Aton. Matud pang Villarin pulos election related ang maong hitabo. (BANATNEWS)