Election madayon gyud karon

CEBU, Philippines - Gideklarar sa Commission on Elections (COMELEC) nga 90 ngadto sa 95 porsiyento kahingpit na ang tanang sistema alang sa eleksyon sa barangay karon.

Kini sa dihang gipamowawan sa sentral nga buhatan sa Comelec ang pagpanghatod sa mga material o kasangkapan sama sa mga balota alang sa botasyon sa barangay sa tibuok nasud hangtod kagahapon.

Matud pa ni James Jimenez tigpamaba sa Comelec nga bisan luyo sa daghang mga babag, apan sa gihapon nagpasalamat sila nga nahuman gyud ang tanang mga kasangkapan alang sa eleksyon karon. Usa sa nakalangay ug nakababag sa pagpangandam sa Comelec, mao ang bagyong Juan nga miigo sa amihanang bahin sa Luzon apan nakaapektar sa ubang bahin sa nasud ilabi na sa Manila.

Miingon si Jimenez nga nagbinuntagay og trabaho ang ilang mga kawani niadtong Sabado sa gabii aron ikahatod sa mga lalawigan ang mga balota pinaagi sa barko ug sa mga eroplano.

Busa karong adlawa, matud pa ni Jimenez , wala na sila kulbai tungod kay hapsay na ang tanang sistema alang sa pagpatuman sa piniliay sa barangay ug sa Sangguniang Kabataan karon..

Hinuon gisuspenso gyud sa Comelec ang piniliay sa barangay ug SK didto sa tulo ka lungsod sa lalawigan sa Isabela, nga mao ang Divilacan. Maconacon ug Palanan nga pulos nasabak sa bagyong Juan. (BANATNEWS)