CEBU, Philippines - Patay ang usa ka trabahante samtang kritikal ang usa ka higala niini human gipaulanan og bala sa duha ka lalaking nagsakay og motor pasado alas-3 sa kaadlawon sa national highway sa barangay Buanoy lungsod sa Balamban.
Ang namatay nailhan nga si Steve Dumdum, molupyo sa maong lugar samtang ang kritikal usab si Arvil Ryan Paradero, 23, molupyo sa barangay Sta. Cruz sa maong lungsod.
Sa pakighinabi sa Banat News ni PO3 Celso Diaz kini mibutyag nga ang duha ka biktima uban sa usa nila ka higala nga si Crisalde Capuno Alcotin Jr. gikan nag-inom sa usa ka tindahan sa maong barangay.
Samtang sila padulong na mamauli sakay sa usa ka motor nga gimaneho ni Dumdum gisundan kini og duha ka wala mailhing mga lalaking luwan og motorsiklo.
Pag-abot sa maong lugar kalit lang sila nga gibabagan sa maong motor ug sa walay igong hinungdan ang backrider mipaulan kanila og bala.
Si Dumdum ug Paradero parehong nakaangkon og samad pinusilan samtang si Alcotin daling nakalayat ug nakadagan ug mitago sa kasagbotan.
Samtang ang mga residente daling mitabang sa biktima ug gidali og dala sa Badian District Hospital apan gideklarar kini nga dead on arrival samtang si Paradero gidala usab dayun sa usa ka tambalanan sa Sugbo ug kasamtangan pa nga anaa sa talandugong kahimtang.
Nakuha sa kapolisan ang lima ka kabhang sa kalibre .45 ug usa ka deformed slug sa wala pa masayring klase sa bala. (BANATNEWS)