CEBU, Philippines - Tungod sa kawala pay kasigurohang moabot sa hustong oras kagahapon ug karong buntaga ang mga election paraphernalia gikan sa Commission on Elections sa Manila ngadto sa tanang rehiyon sa nasud adunay opsyon ang election officers (EO) nga kanselahon ug ugma nalang ipadayon ang pagbotar.
Kini maoy gipahibalo ni Comelec-7 acting regional director Veronico Petalcorin sa pakighinabi sa Banat News kagahapon sa hapon.
Pipila ka mga election officers sa nagkadaiyang mga lugar sa Central Visayas ang padayong nagpaabot sa ilang mga election paraphernalia nga kinahanglan pang ihatud diha sa ilang lungsod o sila’y mangunay pagkuha gikan sa ilang mga provincial treasurer’s office.
Matud pang Petalcorin nga adunay resolusyon ang Comelec-Manila nga wala pa’y ‘numero’ apan pinirmahan na ni Commissioner Gregorio Larazabal ang naghatag og opsyon sa election officers kun malangay gyud ang mga gamit.
“Gi-route na ni siya (resolusyon) pero usa pay nakapirma. Subject for finality nalang. I-assess sa election officers kung dili makaabot sa alas-12 (sa udto karon) maka-decide sila to postpone,” matud pang Petalcorin.
Sumala pang Petalcorin, ang maong resolusyon mihatag og gahum sa mga election officers sa pag-oktaba sa pagbotar ug isibog kini ugma (Martes) kun dili pa gyud makaabot sa ilang mga dapit ang election paraphernalia.
Matud pa ni Petalcorin nga kun sa pagtan-aw sa EOs madala pa nila sa oras mahimo gihapon sila mopadayon bisan lapas na og alas-12 sa udto ug tugutan silang makapadayon hangtud lamang sa alas-5 karong hapon.
Ang pagbotar magsugod sa buntag ug tak-upan alas-3 sa hapon. Hinuon ang mga botanteng makalinya o diha na sa sulod sa 30-meter radius sa voting precincts kinahanglang pabotaron gyud.
Kagahapon sa hapon gisugat na sa mga city ug provincial treasurers ang mga election paraphernalia sa Mactan Airbase sumala pa ni Provincial Comelec supervisor Lionel Marco Castillano.
Si Castillano mitug-an sa Banat News nga ang abyon nga gikargahan sa election paraphernalia gikan sa Manila midiretso ngadto sa Tacloban, Leyte naghatud usab sa election paraphernalia una pa milahos sa Sugbu.
Gipaniguro niya nga mahuman og pang-apod-apod ang mga election paraphernalia ngadto sa mga Board of Election Inspectors (BEI) nga magamit karong adlawa.
Matud niya nga gilauman nga sa Martes pa sa kaadlawon mahuman ang pag-ihap sa mga balota tungod kay ang matag cluster precinct dunay maximum nga 400 ra ka mga botante. (BANATNEWS)