Korean diver nalumos sa Lapu'

CEBU, Philippines - Patay ang usa ka Koreano nga gituohang nalumos nga human mo-dive sa Tambuli West Resort sa barangay Maribago sa dakbayan sa Lapulapu kagahapon sa hapon.

Ang namatay mao si Minchoy Jeung, 20, ug usa ka tinun-an ug nagpuyo sa usa ka boarding house sa dalan Don Jose Avila sa dakbayan sa Sugbo.

Si PO3 Dioscoro Arong nga nahinabi sa Banat News miingon nga kuyog sa namatay ang iyang mga kauban nga Koreano nag-diving sa nahisgutang lugar nga may gilawmon 19 ka tiil.

Sumala pa base sa pamahayag sa mga kauban niini kalit lang nawagtang sa panon si Minchoy ug dihang ilang nakit-an wala na kini maginhawa pa ug gituohang nalumos.

Ang mga diver sa Tambuli West Resort mao na’y mitabang sa biktima ug gidala sa Mactan Doctors Hospital apan gideklarar kining patay na.

Ang patay’ng lawas sa maong Korean national ang kasamtangan karong gipahimutang sa Rolling Hills sa barangay Banilad sa dakbayan sa Mandaue ug ipaubos pa kini sa autopsy.

Gitataw ni Arong nga mohimo pa sila og dugang pakisusi sa maong insidente ug ipatawag usab ang dive instructor niini. (BANATNEWS)