CEBU, Philippines - Patay ang usa ka incumbent nga kagawad ug mopasubli unta sa ikatulong higayon karong adlawa diha sa barangay Sayaw, lungsod sa Barili human kini natagak gikan sa iyang gisakyang multicab niadtong Biyernes sa gabii diha sa barangay Guibuangan sa nahisgutang lungsod.
Ang namatay sa aksidente mao si Felix Aguilar, 57, kagawad sa barangay Sayaw human kini mapantok sa dalan gikan sa pagkatagak sa gisakyan.
Si Sr. Insp. Marlon Gumabao, hepe sa Barili Police Station nga nahinabi sa Banat News kagahapon mibutyag nga si Aguilar adunay mga kauban diha maglingkod sa likod nga bahin sa box type nga Isuzu multicab nagtangag sa plakang YBU-234 nga gimaneho ni Romeo Bayno, 43, residente usab sa barangay Sayaw ug paryente sa biktima.
Matud ni Gumabao nga paingon ang grupo ni Aguilar ngadto sa barangay Naisipit apan pag-abot diha sa lugar nga nahitaboan kalit lang nga natangtang ang lock sa ali sa multicab sa walang bahin diin maglingkod si Aguilar.
Tungod kay nagdagan ang sakyanan naabli kini ug nahagbong ang kagawad, ang mga kauban ni Aguilar diha sa likod misuway unta sa paggunit kaniya aron dili malahos ngadto sa karsada apan wala na kini magpugngi pa.
Si Aguilar nakaangkon og grabeng kadaot sa lawas tungod sa pagkabunal niini diha sa sementadong dalan ug daling gidala sa iyang mga kauban ngadto sa Barili District Hospital apan tungod sa kahimtang niini gibalhin ngadto sa Vicente Sotto Memorial Medical diin wala na siya makaabot nga buhi.
Si Bayno temporaryong gidetiner diha sa Barili Police Station ug matud pa usab ni Gumabao nga naghuwat silang moanha sa ilang buhatan ang mga paryente ni Aguilar aron mopasaka og kaso.
Samtang sa pakighinabi sa Banat News sa usa ka molansaray sa pagka-kagawad nga si Nelson Libaton sa silingang barangay sa Sayaw nga barangay Minulos si Aquilar magtulo na ka termino kun masublian unta karong adlawa.
Gani wala siya magdahom nga mao diay kadto ang mahitabo sa biktima tungod kay nangampanya pa gani kini.
Midugang si Libaton nga sa wala pa mapiling kagawad si Aquilar usa kini ka kanhi barangay tanod kaniadto maong taas na ang naserbisyo niini sa maong barangay sukad pa kaniadto. (Uban sa report ni Lesley Caminade) (BANATNEWS)