Balay alampoanan gipabothan

CEBU, Philippines - Usa ka residente diha duol sa Balay Alampoanan nga nahimutang sa ibabaw’ng bahin sa Vista Grande Subdivision, barangay Bulacao, dakbayan sa Talisay mipaalarma tungod kay nahadlok kini human makabati og buto sa pusil gikan sa maong dapit.

Si Insp. Hugo Rio Ipong kinsa usa sa mialarma sa maong insidente sa pakighinabi sa Banat News kagahapon mibutyag nga pag-abot nila sa lugar dunay daghang tawo ug mga sakyanan diha sa Balay Alampoanan ug gituohan nga dunay gipahigayong salo-salo.

Matud ni Ipong nga si Insp. Jose Nilo Abello maoy miduol sa Balay Alampoanan ug gipangita si Joavan aron kini estoryahon apan wala kini moatubang.

Hinuon dunay migawas gikan sa Balay Alampoanan kinsa nagpailang higala ni Joavan ug maoy nakig-estorya sa mga polis.

Base sa report nga nadawat nila ni Ipong dunay giingong nagpabuto og pusil diha sa Balay Alampoanan ug mga usa ka oras ang milabay kwitis na ang gipabuto.

Si Joavan sa iyang bahin, sa mensahe sa text nga iyang gipadala sa Banat News kagahapon mihimakak sa maong pasangil batok kaniya.

“Wa gyud nahitabo party, ang kadto nag-complaint maoy nag-inom, usa ka proof nga bug-at kaayo mao pud niatras ang 3 ka patrol car nga niari saksi ang anak ni Vice Gov. kay diri siya atol adto kay iya ko gikuha sa balay, walay nagpabuto ug labaw na wala nag-party diri,” sumala pa sa text ni Joavan sa Banat News. (BANAT NEWS)