Comelec andam na sa election ugma

CEBU, Philippines - Andam na ang tanang kahimanan ug kasangkapan sa Commission on ‘Elections (Comelec) gikan sa Manila alang sa eleksyon ugmang adlawa, sumala ni Election Officer Marchel Sarno sa Cebu City North District.

Matud pa ni Sarno nga naabot na ang tanang mga election paraphernalia kagahapon sa buntag ug nagpaabot nalang sila sa mga Board of Election Inspectors (BEI) nga kuhaon kini nila karong adlawa gikan sa buhatan sa tresurera ning dakbayan.

Miingon siya nga ang city treasurer’s office maoy in-charge sa pagpanghatag sa mga election paraphernalia ngadto sa BEI diin gikan sa maong buhatan ang mga BEI mohapit usab sa buhatan sa Comelec aron kuhaon ang voter’s lists.

Kagahapon nagkanayon usab si Sarno nga wala silay nasugatang problema sa pagpangandam nila sa barangay election ugma.

Samtang sa bahin usab ni Comelec Provincial director Lionel Marco Castillano, siya mibutyag nga kagahapon sa buntag naabot na ang mga ballot boxes ug mga pasiunang mga electon paraphernalia alang sa kalungsoran ning lalawigan.

Matud pa ni Castillano nga nagmala-umon ang ilang buhatan nga unta karong adlawa makompleto na ang ilang election material nga gikinahanglan.

Midugang si Castillano nga kasamtangan pa karong anaa sa bodega ang mga kagamitan alang sa election nga ila unya nga ipakatap sa lalawigan sa Sugbo. (Uban sa report ni Lesley Caminade) (BANAT NEWS)