Naproblema sa kuwarta nag-amok, 1 angol

CEBU, Philippines - Talandugon ang kahimtang sa usa ka 19-anyos nga batan-on human giingong gidakdakan og bato sa ulo makadaghang higayon sa nag-huramentadong lalaki kinsa talandugon usab ang kahimtang human kulataha sa mga estambay diha sa barangay Poblacion sa lungsod sa Sibonga niadtong Biyernes gabii.

Ang biktima mao si Ricarida Langga, 19, molupyo sa barangay Bulasa lungsod sa Argao ug nagtrabaho sa usa ka tindahan sa maong lugar samtang ang suspek mao si Felix Niere, 31, molupyo sa barangay Nangka lungsod sa Boljoon.Matud ni PO2 Joey Moreno, imbestigador sa Sibonga Police dihang nahinabi sa Banat News subay sa imbestigasyon gikan sa lungsod sa San Fernando ang suspek luwan sa minibus.

Apan pag-abot sa Sibonga ni-backing ang minibus ug gipakanaug ang suspek hinungdan nga nasuko kini og maayo ug nanghagis dayun gibato ang minibus ug maayong pagkalumping sa tuong bungbong niini.

Dihang misaylo na ang minibus nakit-an niini ang biktima daplin sa karsada nga nagpaabot usab og masakyan padulong sa Argao nga nagpunay og text ug iyaha kining giduol dayung gihapsan og bato sa ulo ug pagkatumba gi-usban pa niya kini og dakdak sa ulo hangtud nga nagkadugo ug nakuyapan.Ang mga estambay sa maong lugar nga naluoy daling miresponde ug gitabangan og kulata ang suspek hangtud usab nga kini nakuyapan tungod sa kagrabe sa bun-og.

Ang mga polis nga miresponde mao nay midala sa duha nga parehong wala nay panimuot ngadto sa Vicente Sotto Memorial Medical Center (VSMMC) ug gihulagway nga pulos talandugon ang kahimtang.

Si PO3 Ederlino Bacusmo, imbestigador sa Sibonga police station dihang nakahinabi sa Banat News mibutyag nga problemado ang suspek tungod kay operahanan ang kapikas niini diha sa VSMMC.

“Ang suspek mialegar nga didto siya sa Minglanilla kay nanghulam og kwarta sa iyang mga kaliwat aron ibayad sa operasyon, unya wala makadala og kwarta maong nagbaklay ni siya padulong sa San Fernando,” matud pang Bacusmo.

Ang suspek giingong diha na misakay og minibus sa San Fernando apan wala kini makabantay nga kutob ra kini sa Sibonga maong kini nasuko nga gipakanaog. (BANAT NEWS)