Mayor mikiha'g konsehal

CEBU, Philippines - Ang mayor sa lungsod sa Aloguinsan mipasaka og kasong kalapasan sa balaod sa election batok sa usa sa iyang konsehal tungod sa pagparehistro niini sa siyudad sa Sugbu.

Si Aloguinsan mayor Augustus Caesar Morena mipasaka og kasong kalapasan sa Art XXII Section 261 sa Batasang Pambansa Blg. 881 kon Omnibus Election Code batok kang Marilou Mancia Ripdos usa sa konsehal sa lungsod sa Aloguinsan sa lalawigan sa Sugbu.

Kini tungod sa pagbutang og sayop nga data sa registration niini sa Comelec ug ang pagparehistro niini og balik nga wala magkansela sa nahaunang registration sa laing Comelec office.

Sigon pa ni Moreno sa iyang tulo ka pahinang affidavit of complaint nga giduso kagahapon sa Cebu City Prosecutors Office nga niadtong Marso 23, 2009 si Ripdos nagparehistro sa siyudad sa Sugbu.

Apan wala gipakanselar niini ang iyang unang registration sa Comelec niadtong Nobiyembre 9, 2003 ug gani mao pa kini ang gibasehan sa pagdagan ug pagkadaug ni Ripdos sa pagkakonsehal sa lungsod.

Matud pa ni Moreno nga bisan og Ma. Lourdes Mancia Ripdos ang gigamit nga pangalan sa konsehal sa pagparehistro niini sa siyudad sa Sugbu apan ang picture ug ang mga fingerprints niini klaro kaayo nga usa ra kini ka tawo.

Ang mayor miingon nga klaro kaayong gilingla ni Ripdos ang Comelec sa iyang duha ka registration sa pagbotar hinungdan nga angayan lamang kining silotan subay sa kalapasan nga nahimo niini sa probisyon sa Omnibus Election Code.

Ang Banat News misuway og kuha sa habig sa konsehal apan napakyas ang maong tinguha.  – BANAT NEWS