Sunog gipasangil sa politika

CEBU, Philippines - Gidudahan nga tinuyo ug may kalambigitan sa nagkaduol nga eleksyon sa barangay ang pagkasunog sa usa ka balay didto sa barangay Buguil sa lungsod sa Moalboal niadtong Huwebes sa alas 7:30 sa gabii. Ang balay nga gilamoy sa kayo gipanag-iya ni Pilar Coguita, 74, sa maong lungsod apan gibantayan sa iyang igsoon nga si Condina Coguita.Nasuta nga si Condina usa ka political supporter ni kagawad Dioscoro Infante nga mikandidato sa pagka- kapitan sa maong lugar.Si PO2 Rommel Gako sa Moalboal Police Station mibutyag sa Banat News nga si Condina miadto sa balay ni Infante sa alas 4:00 sa hapon nianang adlawa kay motambong sa miting.

Matud pa sa kapolisan nga samtang nagpulong-pulong sa balay ni Infante nga may gilay-ong 200 metros gikan sa balay nga gibantayan ni Coguita, maoy ilang nakita nga miulbo na ang kayo niini.

Gumikan kay ginama sa mga gaan nga dapat, dali kaayong naugdaw ang maong balay ug wala na hiabti sa kabomberohan.

Gibana -banang mokabat sa P30 mil ang kadaot sa maong sunog.

Subay sa pasiunang pakisusi sa kabomberohan gidudahan nga posibleng tinuyo ang maong sunog tungod sa mga nahipos niining pipila ka ebidensiya nga padayon pa usab karong gipalawman ang imbistigasyon niini.

Sa laing bahin nautingkay ang mga molupyo sa barangay Hapitan lungsod sa Barili sa dihang kalit lang nga misilaob ang kayo sa usa ka panimalay didto pasado ala 1:00 sa hapon kagahapon.

Sa pakighinabi sa Banat News ni SFO3 Frank Donoso, ang fire team leader sa maong lungsod nasayran nga ang maong sunog giingong nagsugod sa balay ni Bernard Cañeta.

Matud pa ni Donoso nga base sa ilang nakuha nga impormasyon nga ang maong kayo naggikan sa kusina sa balay ni Cañeta dihang ang mga baga sa uling nga iyang gisugnod sa iyang linung-ag natagak sa sawog.

Gibana-bana nga mikabat sa P1000 ang danyos sa maong sunog. - Darrel A. Carumba (BANAT NEWS)