Hepe sa CentCom uyon sa amnestiya

CEBU, Philippines - Walay pagsupak ang pangulo sa Central Command nga si Lt. General Ralph Villanueva sa paghatag og amnestiya sa mga rebeldeng sundawo nga mialsa sa kanhi administrasyon ni kanhi Presidente Gloria Macapagal Arroyo niadtong tuig 2003.

Matud ni Villanueva nga adunay nakitang rason ang pamunoan karon ni Presidente Benigno Aquino III paghatag niini og laing kahigayonan sa mga sundawo nga mibatok kaniadto sa gobiyerno.

Gani gisalikway niya ang posibilidad nga abusohan sa mga junior officer sa armadong kusog sa Pilipinas ang paghatag og amnesty ngadto sa Magdalo group nga gipangulohan ni Senador Antonio Trillanes.

Gipasabot niya nga dinhi sa Kabisay-an ang mga opisyal sa military misunod gyud sa chain of command ug andam mosunod kung unsa man ang gimbut-an sa balaod.

Mapasalamaton hinuon si Villanueva ngadto sa administrasyon ni Aquino tungod sa paghatag niini og pundo ngadto sa Office of National Defense aron ilang ikapalit og dugang kahimanan nga ilang magamit kun adunay gubat.

Dugang pa ni Villanueva nga nalipay na ang mga sundawo karon gumikan sa gihatag nga umento sa ilang suweldo ug dugang pang benipisyo nga ilang madawat. – BANAT NEWS