CEBU, Philippines - Ang hepe sa Office of the Senior Citizens Affair (OSCA) sa dakbayan sa Sugbo gipasanginlang mihulga sa iyang mga sakop nga kung dili mosuporta sa iyang gilabanang kandidato sa pagka-kapitan diha sa ilang barangay sa San Nicolas Proper, dakbayan sa Sugbo taktakon niya ang mga ngalan niini gikan sa listahan sa gihatagan og pinansiyal nga hinabang sa siyudad.
Base sa report nga si Guillermo Casinillo kinsa usa ka opisyal sa senior citizen giingong nangampaniya pabor kang Abraham “Boy” Desamparado kinsa midagan sa pagka-kapitan sa nahisgutang barangay atbang sa incumbent nga si kapitan Edgar Lauron.
Ang mga senior citizen gihatagan og tag P4,000 nga pinansiyal nga hinabang matag tuig sa kagamhanan sa siyudad sa Sugbo.
Hinuon si Casinillo mihimakak sa mga pasangil batok kaniya ug nagkanayon nga isip residente sa nahisgutang barangay aduna siya’y katungod nga mopadayag kung unsay anaa sa iyang huna-huna ug pulos kamatuoran ang iyang gisulti.
Gihimakak usab niya ang kabahin sa giingong pagpanghulga niya sa mga sakop sa OSCA nga tangtangon sa listahan.
Matud ni Casinillo nga ang ngalan sa usa ka senior citizen matangtang lang diha sa listahan sa mga nakadawat og hinabang pinansiyal gikan sa siyudad kung patay na kini.
Si Casinillo midugang nga wala siya’y nahimong kalapasan sa balaod sa iyang gibuhat.
Sa laing bahin, si Mayor Michael Rama nagkanayon nga “okay lang” ang gibuhat ni Casinillo tungod kay dili man kini kawani sa city hall.
Iyang gipasabot nga si Casinillo usa lang ka consultant, ug ang gidid-an sa pagpangampaniya mao lang kadtong regular nga mga kawani sa city hall. - Gikan ni Jessica Ann Pareja sa The Freeman (BANAT NEWS)