Kandidato mireklamo

CEBU, Philippines - Usa ka kandidato sa pagka-kapitan sa barangay sa barangay Mohon,dakbayan sa Talisay mireklamo ngadto sa buhatan sa Comelec sa maong siyudad bahin sa iyang pasangil nga ang ilahang barangay hall gihimong headquarter sa incumbent nga kandidato.

Si Talisay City Comelec Officer Corazon Moran mibutyag nga niadtong Oktubre 19, 2010, si Ricardo Cabusas kinsa mikandidato isip kapitan sa barangay Mohon maoy mipadala og letter complaint kaniya.

Gibutyag ni Moran nga sa nahisgutang suwat ni Cabusas nagkanayon kini nga matag eleksyon, ang ilang barangay hall mao kanunay ang himuong headquarter sa mga incumbent nga kandidato.

Matud ni Moran nga sa wala pa ang suwat ni Cabusas, ang anak niining si Macario Cabusas II kinsa mikandidato usab karon isip kagawad sa ilang barangay maoy unang mireklamo ug nangutana kung unsay angayang buhaton sa nahisgutang sitwasyon.

Gipasabot ni Moran si Macario nga maghimo og formal complaint lakipan og ebidensiya aron mabuhatan dayon og aksiyon sa iyang buhatan, apan hangtud karon gawas sa maong suwat wala pa mopadala si Cabusas og formal complaint ug mga ebidensiya.

Si Moran may 26 na ka tuig nga naglingkod isip Comelec Officer sa Talisay ug matud niya nga matag eleksiyon sa siyudad wala siya makasugat og mga dagkung insidente sama sa ubang mga lugar nga dunay mga kagubot.

Hinuon niadtong tuig 1995 ang amahan ni kanhi Bise Mayor Lani Abarquez nga si Judge Leoncio Abarquez ug ang kanhi mayor nga si Deliah Tiu, nagkaatbang sa pagkandidato pagka-mayor ug may dyutay nga tensiyon apan dili bayolente ang sitwasyon.

Sa laing bahin, ang hepe sa Talisay City Police Station nga si Superintendent Henry Biñas nagkanayon nga wala silay nadawat nga mga report kabahin sa mga insidente nga may kalambigitan sa umaabot nga eleksiyon .

Hinuon nakadawat sila og mga reklamo bahin sa giingong may nangawagtang nga mga campaign material sa mga kandidato sama sa mga poster ug uban pa.

Matud usab niya nga dili na siya mag-request pa og dugang polis gikan sa provincial headquarter nga madestino sa Talisay atol unya sa Lunes tungod kay aduna pay laing mga lugar nga        labing nagkinahanglan og mga polis.

Hinuon bisan pa sa kamalinawon sa Talisay matag piniliay, higpit gihapong mabinantayon ang mga polis ug ang mga botante giawhag nga mosayo pagbotar aron malikayan ang kahuot inigkahapon na.