Forecast sa Pag-asa usbon

CEBU, Philippines - Ang director sa Pag-asa Mactan Oscar Tabada nagkanayon nga may kausaban sila karong gihimo sa ilang paghatag og pagbanabana sa lakat sa panahon ilabina sa panahon nga may bagyong moigo dinhi sa nasud.

Sigun sa report, si Tabada miingon nga himuon nilang sayon ang paghatag og weather forecast aron sayon nga masabtan sa katawhan ilabina sa mga mangingisda.

Iyang gitataw nga usa kini sa ilang bag-ong paagi aron ang mga mangingisda nga maoy sagad maapektohan sa bagyo maminaw sa ilang pagbanabana sa panahon ilabina kun may magsingabot nga bagyo sa dili pa sila mangisda aron malikayan ang disgrasya sa kadagatan.

Hinuon giklaro ni Tabada nga dili pa nila hingpit kining mapatuman karon sanglit gikinahanglan pa nilang paaprobahan sa ilang Manila office.

Dugang pa niya, nga ang iyang gipadalhan sa maong proposal mao ang ilang labaw nga opisyal sa Pag-asa Manila.  – BANAT NEWS