2 nagdala'g armas de fuego sikop

CEBU, Philippines - Duha ka tawo sa dakbayan sa Mandaue ug dakbayan sa Lapulapu ang nag-atubang og kaso nga kalapasan sa Comelec gun ban ug Republic Act 8294 kon illegal nga paghupot og armas ug mga bala niini.

Ang mga suspetsado mao sila si Danilo Quina , 38, nga lumad nga taga Caloocan, Manila ug temporaryong nagpuyo sa purok Limonsito sa barangay Umapad, dakbayan sa Mandaue, ug si Cefriano Querbo, 46, nga taga Punta Ingano, sa dakbayan sa Lapulapu.

Si SPO2 Limo Baylosis sa Mandaue City Police Office miingon nga si Quina gikan pa nga nakig-inom sa iyang mga higala dihang nasigpatan kini sa mga polis nga nagluklok og armas de fuego busa gidakop siya ug gipriso.

Samtang si Querbo nasakmitan usab og .45 kalibreng pistola uban sa upat ka buhing bala dihang nasugatan kini nila ni SPO2 Domenciano Luna ug mga kauban nga nagpatrolya sa maong lugar niadtong higayona kinsa mao usay mipapriso kaniya.

Ang duha nag-atubang karon og kaso gumikan sa paglapas nila sa Comelec gun ban.  – BANAT NEWS