CEBU, Philippines - Kanhi boksidor nga gipasanginlang nangulata og drayber sa taksi mihimakak sa mga pasangil batok kaniya kabahin sa nahitabo niadtong Lunes sa gabii sa barangay Basak Pardo, dakbayan sa Sugbo.
Si Andy Tabanas nga nahinabi sa Banat News kagahapon mihimakak sa pasangil nga usa siya sa giingong mikulata kang Alexander Melendrez.
Si Melendrez gialarma sa mga tanod dihang giingong gidukol niini og plato ang iyang kapuyo nga si Juvy Cabulao tungod sa personal nga away, sumala pa nga walay bun-og si Melendrez dihang gidala sa mga tanod apan nakugang nalang sila nga nabun-og na kini pag-abot sa Pardo Police Station.
Si Tabanas nangangkon nga miadto siya sa Pardo Police Station niadtong higayona atol usab nga nasikop si Melendrez tungod kay miduaw siya sa iyang higala nga nadakpan usab.
Matud usab ni Tabanas nga siya pa ang mihatag og tubig ug mitrapo kang Melendrez dihang iyaha kining nakita nga nabun-og na.Gihimakak usab ni Tabanas nga sakop siya sa Barangay Intelligence Network (BIN) sa Pardo kay wala na siya mokuha og bag-ong ID sa BIN.
Kahinumduman nga sila si Beverly Ercido ug Maribel Melendrez mipa-blotter diha sa Pardo Police Station kabahin sa hitabo ug mitumbok kang Tabanas
Ang duha mipasangil kang Tabanas ug sa duha ka mga tanod sa Basak-Pardo nga si Henry Navarro ug Zandra Ahig nga mikulata sa ilang igsuon.
Si PO3 Robert Bobby Escarlan, imbestigador sa hitabo nagkanayon nga posibleng nagdumili si Melendrez pagkuyog maong nasukmagan kini ni Tabanas ug mihuboy ang mata.
Apan matud nila ni Beverly ug Maribel nga wala mosukol ang ilang igsuon dihang gisikop kini sa mga tanod ug wala usab kini tatsa sa lawas dihang gidala ngadto sa police station.
Si Maribel ug Beverly mibahad nga mopasaka og kaso batok sa mga responsable. – BANAT NEWS