Wanted sa Lapulapu sikop

CEBU, Philippines - Nasikop sa mga sakop sa CIDG sa Rehiyon 10 ug kapolisan sa El Salvador sa Misamis Oriental ang usa ka wanted sa dakbayan sa Lapulapu human kini magtagotago sulod sa duha ka tuig.

Ang nasikop mao si Audie Casinillo, 33, minyo, nga taga Brgy. Bankal dakbayan sa Lapulapu ug lumad sa Brgy. Quibonbon, lungsod sa El Salvador lalawigan sa Misamis Oriental.

 Kagahapon sa buntag miabot sa Sugbo ang mga sakop sa kapolisan sa El Salvador ug CIDG 10 pinangulohan ni SPO2 Tasiano Mugot ug PO2 Michael Paler sa CIDG diin uban kanila si Casinillo nga ilang nasikop didto sa Misamis Oriental.

 Matud pa ni SPO2 Mugot nga si Casinillo ilang nasikop pinaagi sa usa ka Warrant of Arrest sa kasong murder nga giluwatan ni Lapulapu City RTC branch 54 Judge Victor Teves niadtong bulan sa Marso 2009 diin walay piyansa nga girekomendar niini.

 Si Casinillo nasigpatan sa pipila ka mga residente sa Brgy. Quibonbon ug gitaho dayon kini sa kapolisan hinungdan sa pagka aresto niini.

 Si Casinillo nag-atubang og kasong murder human niya dunggaba patay ang ilang silingang babaye sa Brgy. Bankal niadtong bulan sa Novembre  2008.

 Si Casinillo nga nahinabi sa Banat News miangkon sa iyang sala kay matud pa ngil-ad og batasan ang iyang silingan hinungdan nga iya kining napatay.   – BANAT NEWS