7 angol sa dinasmagay sa sakyanan

CEBU, Philippines - Pito ka mga tawo ang naangol lakip na ang usa ka American national sa duha ka aksidente sa kadalanan nga nahitabo kagahapon sa buntag sa managlahing lugar dinhi sa dakbayan sa Sugbo.

Ang unang aksidente nahitabo diha sa ilawom sa Sub-way sa Cebu South Road Properties (CSRP) alas 11:10 samtang nilanat lang og pipila ka minutos ang ikaduha nga aksidente nahitabo didto sa barangay Lahug diin upat ka sakyanan lakip na ang motorsiklo ang gidaro sa dumptruck nga puno sa graba nga nawad-an og preno.

Si Terrence Macdnough, 72, nga usa ka American national apan nanimuyo sa Suba, Argao kay naminyo og Pinay anaa karon sa tambalanan human maangol sa maong aksidente..

Ang Pajero nga nagtangag sa plakang YDH 604 ug gimaneho ni Raymundo Saniel Jr., 35, taga Suba, gikan pa sa Argao apan pag-abot sa may subway mi-overtake unta si Saniel sa Isuzu Elf YHK 110 nga iya sa Unifeeds nga gimaneho ni Bonifacio Eredia, 38, taga Tudela Isla sa Camotes.

Matud ni Saniel nga hinay ra iyang dagan apan sa iyang pagpreno mibasiyo kini hinungdan nga midumbol siya sa lubot sa Isuzu Elf nga miresulta hinuon sa pagkaangol sa American national.

Dangtan lang og pila ka minutos gitubag dayon ang disgrasya sa subway dihang ang usa ka dumptruck nga iya sa RLS nga gipanag-iya ni Laniego Suico midaro sa duha ka awto, usa ka multicab ug usa ka motorsiklo nga nagparking niadtong higayona daplin sa karsada diha sa dulhogon nga bahin sa barangay Lahug.

Ang drayber sa maong dumptruck ingon man ang truckboy niini wala pa mailhi sanglit dali kining misibat palayo sa lugar dihang nakita na niini nga daghan ang nangaangol sa maong insidente.

Ang mga nangaangol nailhan atol ning pagsulat mao si Celso Macalaste, ginganlan Renato nga usa ka kusinero, Rosnar Labajo, 21, ug ang drayber ug katabang nga sakay sa Toyota Altis nga nagtangag sa plaka GPP 672.

Si Rene Polinar, tag-iya ug maoy nimaneho sa Toyota Corolla kolor puti nga nagtangag sa plaka GFN 473 nga nahinabi sa mga tigbalita nagkanayon nga nag-aginod nalang siya daplin sa karsada kay paingon siyang magkuha sa iyang anak nga nagtungha diha sa Campridge.

Apan nakabantay siya nga nagpaingon ang dumptruck nga kusog ang dagan niini nga paingon nang mokorbada apan wala na makabawi ang drayber niini hinungdan nga unang naigo ang Toyota Altis kolor maroon nga nag-aginod usab niadtong higayona.

Busa mitakilid ang dumptruck ug naharos ang duha ka awto dayon ang multicab ug motorsiklo nga nagparking usab sa daplin.

Si Fely Bontoyan taga Cantipla ug tag-iya sa multicab GPR 110 miingon nga siya ug iyang bana nangaon niadtong higayona ug mao nalay iyang nabantayan nga nilugapak na ang sakyanan.

Si Renato nga kusinero sa karenderya nga gipanag-iya ni Roel Labajo kansang anak nga si Rosnar parehong nagbarog sa daplin apan naigo pa gyud sa awto nga nadasok sa daplin.

Hinuon ang tanang nangaangol luwas na sa pilegro nga kahimtang samtang dunay uban nga nakagawas na sa tambalanan.

Samtang padayong gipangita ang drayber sa dumptruck nga si Christian Morga nga taga Talamban. – BANAT NEWS