Pangihaw og hayop estriktohon

CEBU, Philippines - Si Mayor Jonas   Cortes sa dakbayan sa Mandaue miluwat og kamandoan nga nagdili sa pagpangihaw og hayop sa mga illegal nga ihawan nga wala mag-agi sa higpit nga pakisusi sa mga sakop sa meat inspector nga nadistino sa maong dakbayan.

Kini samtang ang buhatan sa city veterinarian sa maong dakbayan nakasakmit na og 32 ka kilo nga karne sa baboy nga gituohang giihaw sa gawas sa ihawan sa barangay Labogon nga iya sa kagamhanan sa maong dakbayan.

Ang pagdili sa pagpangihaw sa mga hayop sa illegal nga ihawan gitumong aron masigurong limpiyo ang mga karne sa Mandaue ug luwas nga kaunon sa tawo.

Si Romeo Capa nga maoy Regional Director sa National Meat Inspection Commission (NMIC) 7 miingon nga mailhan ang karne nga gikan sa illegal nga ihawan kay wala man kini mag-agi og inspection sa mga meat inspector nga gidistino sa mga ihawan.

Gitataw niya nga ang karne sa hayop nga nag-agi og inspection sa mga meat inspector adunay tatak o timbre ang karne nga nagpakita nga luwas kini kaunon sa mga tawo.  – BANAT NEWS