Babaye naghikog sa boarding house

CEBU, Philippines - Namatay ang usa ka 23-anyos nga babaye nga gituohang naghikog sulod sa giabangan niining boarding house nga nahimutang diha sa barangay Sangi sa dakbayan sa Toledo.

Si Jenelyn Lasconia, 23, lumad nga taga San Carlos City, Negros Occidental apan temporaryong nag-abang og boarding house nga gipanag-iya ni Reynaldo Villaber.

Si Lasconia napalgang nagbitay ug patay na sa iyang kapuyo nga security guard nga si Franscisco Erbito Curtuna Jr. 30, lumad nga taga San Remegio Cebu ug gwardya sa Toledo Power Company.

Sigun sa imbestigasyon ni SPO1 Jerry Trinidad ug mga kaubanan, si Lasconia naghigot og pisi sa iyang liog ug ang tumoy didto gihigot sa kisame ug napalgan alas-5 na sa buntag.

Si Curtuna mitug-an sa kapulisan nga niadtong Martes pasado alas-10 sa gabii nag-inom siya uban sa iyang mga higala sa tindahan nga nahimutang duol sa ilang gipuy-an. Matud pa ni Curtuna nga giapas siya sa iyang kapuyo ug giagda nga papaulion hinungdan nga misunod siya sa pagpauli apan giingong nagkalalis silang duha dihang nabantayan niining nanghipos kini sa ilang mga butang kay buot kining mobalik sa karaan nilang gipuy-an nga boarding house.

Si Curtuna nitug-an nga aron paglikay nga modako pa ilang lalis, nakahukom nalang siya nga matulog ngadto sa bakante nga pikas kuwarto apan kagahapon sayo sa buntag nasurpresa nalang siya dihang iyang nakita nga nagbitay na ang iyang kapuyo.

Matud pa sa kapulisan nga nahibulong ang mga ka boardmates sa duha sanglit wala sila makabantay nga adunay komosyong nahitabo nianang gabhiuna. - BANAT NEWS