CEBU, Philippines - Gitug-an ni Vice Governor Gregorio Sanchez nga iyang gipaundang ang pagdungog sa mga sakop sa Hunta Probinsiyal sa kapin P3 bilyones nga annual budget sa Kapitolyo sa sunod tuig.
Kini tungod kay dili man siya maoy nag-preside sa session sa mga sakop sa Hunta Probinsiyal sanglit siya man karon ang nagsilbing gobernador sa lalawigan nunot sa pagbiyahi ni Gob. Gwendolyn Garcia sa nasud sa China.
Sigon pa ni Sanchez sa interbyu sa DyRF nga iyang giingnan ang acting vice governor nga si Provincial Board Member Agnes Magpale nga maoy nag-preside sa sesyon sa Hunta Probinsiyal dihang napasar sa unang reading ang annual budget sa Kapitolyo nga hunungon una ang pagdungog niini.
Matud pa ni Sanchez nga daghan siya og tukion sa maong budget proposal usa na niini ang mga dagkong mga gahin sa nagkadaiyang departamento sa Kapitolyo samtang ang ilang Legislative Assistance Fund (LAF) gikapnan sa gobernadora.
Si Sanchez miingon nga gusto siya nga mabalik ang hearing sa maong budget ini og abot na sa gobernadora kay makabalik na usab siya sa pag-preside sa session sa Hunta Probinsiyal.
Gipahibawo ni Sanchez nga si Magpale misanong usab sa iyang gihangyo nga dili una ipadayon ang pagtuki sa budget hearing samtang dili pa madungog sa provincial board ang tanang mga yangungo ug pagkwestiyon sa iyang buhatan. – BANAT NEWS