2 balay naigo sa landslides sa Manipis

CEBU, Philippines - Nangaguba ang balay sa kapitan ug kagawad sa barangay Manipis, dakbayan sa Talisay human mangaigo sa midahiling yuta tungod sa sunod-sunod nga pagbunok sa uwan niadtong Lunes sa hapon. Si Kapitan Joselito Laurente nga nahinabi sa Banat News kagahapon mibutyag nga ang iyang balay ug ang balay sa iyang kagawad nga si Edwin Ebin diha sa sitio Telepono nadahilian sa yuta ug mga bato.

Hinuon wala gyud hingpit matabuni ang maong mga balay apan nakaangkon kini og mga danyos, swerte usab nga wala nasakitan sa mga sakop sa ilang mga pamilya sa maong hitabo.

Sa pagkakaron ang pamilya nila ni Laurente ug Ebin temporaryong miipon una og puyo ngadto sa balay ni Kagawad Elde Juarez nga nahimutang sa ibabaw nga bahin sa ilang lugar.

Matud ni Laurente nga ang yuta nga midahili mitabon ngadto sa karsada ug dili kini maagian hinungdan nga nangayo sila og panabang ngadto sa kagamhanan sa siyudad.

Ang buhatan sa city engineering sayo sa buntag kagahapon mipadala og payloader nga maoy mipadaplin sa yuta nga mitabon diha sa karsada ug nianang pagka-udto ang katunga nga bahin sa karsada nahawan na.

Si Felipa Solana, hepe sa City Social Welfare sa pakighinabi niini sa Banat News kagahapon nagkanayon nga giproseso nila nga mahatagan og pinansiyal nga hinabang ang pamilyang naapektohan sa landslide.

Mipatawag kagahapon og emergency meeting ang technical working group sa Regional Disaster Risk Reduction and Management Council alang sa pagpangandam sa mga kalamidad nunot niining pagpunay og uwan-uwan nga nasinati karun dinhi sa Central Visayas gumikan sa bagyong Juan nga inabagan sa hanging habagat ug sa La Niña. Si Florenda Gabiola, officer in Charge sa OCD nagkanayon nga bisan tuod og dili apektado ang Central Visayas sa bagyo kinahanglang mangandam gihapon tungod sa hangin habagat.

Si Oscar Tabada, director sa Pag-Asa mitug-an nga kagahapon sa buntag ang bagyong Juan anaa sa 210 kilometer southwest sa Laoag City nga dunay gikusgon nga 175 kilometer per hour ug nag-irog sa amihanang-kasadpan nga dunay gipaspason 222 kilometro matag takna. Matud pa niya padayong masinati ang kusog nga uwan apan base sa satellite data nipis ra kaayo ang dag-om sa Sugbu tungod usab sa hanging habagat apan delikado pa gihapon kini sa mga kabaybayunan ug sa mga gagmay’ng sakyanan sa dagat.

Sumala pa ni Tabada nga karung tuiga moabot og 19 ngadto sa 20 ka bagyo ang moigo sa Pilipinas ug ang bagyong Juan maoy ikanapulo nga bagyo, gibana-banang duha pa ka bagyo ang mosulod una pa matapos ang tuig.

Si Dr. Expedito Medalla sa DOH-7 mipahimangno usab nga ang pag-uwan-uwan magdala usab og mga sakit ug kinahanglang limpiyo kanunay ang tubig kay anha diha makuha ang sakit nga diarrhia, liptospirosis, typhoid fever, dengue, Malaria, Hepa A ug pagka-kuryente.

Human sa pagkuso-kuso sa amihanan Luzon gipaabot nga mobiya na sa Pilipinas ang super typhoon Juan padulong sa South China Sea apan base sa pag-irog niini gikabalak-ang labing dugay sa Huwebes pa kini hingpit nga mogawas.  – BANAT NEWS