CEBU, Philippines - Irekomendar sa pangulo sa kapulisan sa Central Visayas Chief Supt. Ager Ontog Jr. alang sa spot promotion ang pulis nga nakapusil sa duha ka tulisan nga mitulis sa usa ka lending firm sa miaging semana diha sa barangay Sambag 2 ning dakbayan.
Atol sa flag raising kagahapon sa buntag diha sa PRO-7 sa Camp Sergio Osmeña Sr. gitauran og Medalya ng Kagalingan sa kadagkuan sa kapulisan dinhi sa rehiyon si PO3 Osorio Ramiso Jr. nga nadestino sa Police Community Relation (PCR) sa PRO-7.
Sa miaging semana, gitulis ang usa ka lending firm sa mga sakop sa Meloy Garcia Robbery Group nga nagbase sa Bohol, bisan ang ilang lider nga si Meloy Garcia napriso sa maong lalawigan.
Apan walay swerte ang maong mga tulisan nga sila si Alberto Torregosa ug Shyrill Ostea kay napusilan sila ni Ramiso kinsa miresponde sa hitabo hinungdan sa ilang pagkaangol ug pagkasikop sa ilang lookout nga si Joel Torregosa Nuez.
Matud pa ni Ontog nga ang pasidungog kang Ramiso maoy labing taas nga mahatag niya ngadto sa usa ka pulis apan iyang dad-on ngadto sa Campo Crame ang kalampusan niini aron mahatagan kini og spot promotion. “I congratulate him (Ramiso) to be a protector, a very good model and a very good example,” matud pa ni Ontog. (BANATNEWS)