Colombian nakaikyas sa 'rapist'

CEBU, Philippines - Diriyot makuha ang pagkababaye sa usa ka dalagang Colombian human giingong gisuwayan og pahimulos sa usa ka lalaki pasado alas-5 sa miaging hapon sa barangay Apalan lungsod sa Tuburan.

Ang 29-anyos nga Colombian kasamtangang nagpuyo sa barangay Putat sa maong lungsod gipasanginlan niini ang usa ka 21-anyos nga lalaking (ngalan gipugngan sa Banat News) taga barangay Bagasama sa maong lungsod nga misuway og among-among kaniya.

Nasayran gikan ni SPO4 Edgar Dumango sa Tuburan Police station sa pakighinabi sa Banat News nga ang mismong langyaw ang misumbong kanila sa nahitabo.

Matud pa sa alegasyon sa langyaw nag-snorkeling kini sa dagat dihang kalit nga miduol ang suspetsado kaniya ug giingong gisuwayan siya niini paggakos.

Apan maayo nalang kay nakalihay dayun kini ug daling milangoy padulong sa daplin ug milahos ngadto sa kapolisan aron mosumbong.

Wala magdugay mitahan ra usab dayun ang gitumbok nga suspetsado ngadto sa buhatan sa kapolisan sa lungsod sa Tuburan uban sa kapitan sa barangay Apalan nga si Salvacion Pesiao.

Kasamtangan pa karun nga natanggong ang suspetsado sa karsel sa lungsod sa Tuburan samtang ang kapolisan padayon pa usab nga nangita sa Colombian aron sutaon kun mopasaka ba kini og kaso batok sa giingong misuway sa pagpahimulos kaniya. (BANATNEWS)