Gibangkaw sa papa tipi

CEBU, Philippines - Usa ka lalaki ang gibangkaw ug napatay sa iyang kaugalingong amahan samtang ang biktima nahinanok sa pagkatulog sulod sa kwarto diha sa ilang pinuy-anan sa Centro Liboron lungsod sa Carcar niadtong Domingo sa alas 9:00 sa gabii.

Ang biktima mao si Moises Estabi Abarquez, 39, molupyo sa Mangcao Subdivision sa barangay Poblacion-3 samtang ang suspek mao ra mismo ang iyang kaugalingong amahan nga si Loreto Abarquez, 63, nagpuyo usab sa susamang lugar.

Matud pa ni SPO1 Norman Lopena sa Carcar police station dihang nahinabi sa Banat News subay sa imbestigasyon nahinanok sa pagkatulog ang biktima dihang gisekreto kini og kamang sa amahan.

Sumala pa sa kapolisan migamit og tinalinisang kabilya ang suspek nga giporma og bangkaw dayung giduslak sa sentro sa tiyan ang biktima.

Matud pa nakabati pa ang pipila nila ka mga kabanay sa panimalay sa singgit sa biktima nga nangayo og pakitabang human makamata ug nakit-ang nagtaroy na sa iyang lawas ang bangkaw sa amahan.

Ang suspek daling migawas samtang gitabang ang biktima ug gidala sa Carcar District Hospital apan gideklarar sa mga doktor nga dead on arrival.

Ang suspek wala na makaipsot ug nadakpan usab dayun sa mirespondeng mga polis.

Dugang nahipos nga impormasyon sa mga imbestigador, giingong nasuko ang suspek sa anak tungod sa pagsige niini og panghilabot sa ilang mga butang nga iyaha sad ibaligya.

Ang kapolisan nakadawat usab og dili pa kompirmadong report nga mamuhatay og armas ang suspek ug gikatahong usa sa ilang giawayan mao ang pagbuot-buot sa biktima og pamaligya sa mga binuhat nga armas sa amahan.

Ang kapulisan padayon pa sa ilang imbestigasyon pagtumbok sa tinuoray’ng motibo sa maong krimen tali sa amahan ug anak. (BANATNEWS)