CEBU, Philippines - Usa ka mag-uuma nga mitan-aw sa nagduwa og billiard naigo sa bala dihang ang tawo nga katupad niya, nakahupo dihang gipusil sa iyang kontra atol sa piyesta didto sa sitio Libo, barangay Katulohan, lungsod sa Dalaguete niadtong Domingo sa kaadlawon.
Ang biktima mao si Edito Pepito Ruiz, 41, minyo, usa ka mag-uuma nga taga Libo.
Samtang ang suspek nailhan lang sa ngalang Mitoy, 22 , ulitawo, nga taga Sitio Amosaw sa maong barangay.
Si PO3 Domino Ravanes sa Dalaguete Police Station mitug-an sa Banat News nga mitan-aw sa nag-billiard ang biktima dihang kalit nga nahiabot ang suspek.
Sa dihang nakita sa suspek ang iyang kontra kinsa mitan-aw usab sa billiard niadtong tungora kalit kining milanit sa iyang armas de fuego ug sa walay langanlangan gitirohan dayon ang iyang kontra.
Apan giingong abtik pa sa kilat nga mihupo dayong dagan ngadto sa ngitngit nga kalibonan ang naulahi, maoy hinungdan nga didto motaroy ang bala sa wala hisayring kalibre nga armas de fuego sa bukton sa biktima.
Ang biktima didto dad-a sa Alcantara Memorial Hospital , samtang ang suspek padayon pang gipangita sa kapolisan human kini mosibat. (BANATNEWS)