'Juan' nagkakusog sa n. Luzon

CEBU, Philippines - Samtang nagkaduol ang pag-abot sa bagyong Juan sa northern Luzon gisugdan na ang pinugsanay nga pagpabakwit sa mga molupyo sa maong dapit sumala pa sa National Disaster Risk-Reduction and Management Council.

Ang mga opisyales sa disaster management officials sa Cagayan Valley mipabakwit na sa mga residenteng gikunsiderar nilang anaa gyud sa peligro ini unya og tugpa sa bagyo diha sa ilang dapit.

Ang bagyong Juan gikunsiderar nang usa ka super typhoon hinungdan sa dinaliang pagpabakwit sa mga residente ug niadtong mga nagpuyo duol sa kabaybayonan aron malikay sa peligro sa dagkong bawod.

Sa report sa GMA News.Tv nga gikutlo sa dzBB gitambagan ang mga residente sa pagbalhin na sa mas taas nga lugar tungod kay gipaabot nga adunay dagkong bawod nga masinati samtang magkaduol ang mata sa maong bagyo.

Gipaabot nga ang bagyong Juan unang moigo diha sa Cagayan Valley sulod sa 24 oras.

“Cagayan including Calayan and Babuyan Group of Islands, and Isabela will experience stormy weather with rough to very rough seas," matud pa sa Philippine Atmospheric, Geophysical & Astronomical Services Administration.

Matud pa sa bulletin, ang Northern Luzon makasinati og mga pag-uwan ug kusog nga paghapak sa hangin samtang ang kinatibuk-ang nasud makasinati og mapanganurong kalangitan ug panagsang pag-ulan, pagdugdog ug pagkilat.

Gibutang na kagahapon sa Storm Signal No. 3 Juan (nga may international nga pangalang Megi) samtang kini padayon sa direksyon sa Cagayan Valley, Calayan islands, Babuyan islands, ug Isabela sumala pa sa Pagasa.

Kini nangahulogang ang kinakusgang hangin nga na-rekord sa maong bagyo may gikusgong 185 kilometers matag oras ug posibleng moigo sa maong mga dapit.

Lakip sa makasinati og 60 kph-100 kph nga hangin ug ibutang sa storm signal No. 2 ang Batanes islands, Ilocos Norte , Ilocos Sur, Apayao, Abra, Kalinga, Mountain Province, Ifugao, Nueva Vizcaya, Quirino, ug Northern Aurora.

Ang La Union, Benguet, Pangasinan, Nueva Ecija, ug Aurora, gibutang sa storm signal No. 1 sugod kagahapon sa ala-una sa hapon. (BANATNEWS)