Gullas: Sugbuanon nabulahan kang Arsobispo Ricardo Cardinal Vidal

CEBU, Philippines - Ang Arsobispo sa Sugbo Ricardo Cardinal Vidal mikompirmar kagahapon sa mga tigbalita nga sulod sa tulo ka buwan sugod niadtong milabay’ng adlaw moretiro na siya isip Arsobispo sa Sugbo.

Matud ni Vidal sa mga tigbalita kagahapon human sa gihimo niining Santos nga Misa sa Talisay City Jail naabot na sa milabay’ng adlaw ang iyang order gikan sa Santo Papa nga nagtugot sa iyang pagretiro diin sulod sa sobra upat ka tuig na ang milabay una pa dawata sa Santo Papa nga moretiro na siya.

Si Vidal hulipan ni Arsobispo Jose Palma sa Palo, Leyte maoy mopuli kaniya kinsa gikatakdang moabot karong Miyerkules aron sugdan na ang inanay nga pagpasa ni Vidal sa iyang katungdanan nga matapos sa hingpit karong Enero.

Si Palma kanhi Padre Kura sa Santo Rosario Parish Church ning dakbayan una pa kini mabalhin sa Calbayog, Leyte.

Giangkon sa arsobispo nga bukas ni bisan kinsang mobisita sa iyang panimalay ang mga tawong magkinahanglan kaniya.

Si Kong. Eduardo Gullas sa unang distrito sa probinsiya sa Sugbo nagkanayon nga bulahan ang Sugbu nga nakabaton og arsobispo nga sama kang Vidal. Si Vidal miserbisyo sa Sugbu dul-an na 30 ka tuig.

Si Gullas misaysay nga si Vidal miabot nganhi sa Sugbo dihang nagpanuigon pa kini og 51-anyos ug mao kini ang Padre Kura sa Cebu Metropolitan Cathedral ug ang iyang inahan nga si “Inday Pining” Gullas maoy presidente sa Parish Pastoral Council niadtong panahona. Gibutyag ni Gullas nga giisip sa iyahang inahan nga anak usab niini ang Arsobispo ug manghud kini sa Kongresista.Ang “first banquet” alang sa Arsobispo kaniadto diha gipahigayon sa University of the Visayas Gym.

Ang private nurse sa Arsobispo nga si Adrian Aguilar Aba, 24-anyos kinsa maoy gitudlo ni Sister Gaudelia Baloyot, SPC, Nursing Directress sa Perpetual Soccuor Hospital nagkanayon nga mapasalamaton siya ug mapasigarbuhon nga maoy napiling moatiman sa Arsobispo. Gihulagway ni Aba nga ang Arsobispo usa ka maayong tawo, pasensiyoso ug mapaubsanon ug bisan paman sa sakit niining diabetes ug arthritis dili kini sama sa ubang mga masakiton nga init og ulo ug saputon. (BANATNEWS)