NGCP nangandam sa bagyong juan

CEBU, Philippines - Mihimo na og kaugalingong preparasyon ang National Grid Corporation of the Philippines (NGCP) alang sa pagsulod unya sa gikabalak-ang bagyong Juan nga mamahimong super typhoon.

Sa gipadalang pamahayag sa NGCP sa Banat News, gi-activate na sa maong ahensya ang tanang command centers tungod sa bagyong Juan.

Base sa inisyal nga pagbana-bana sa Philippine Atmospheric Geophysical and Atmospherical Services Administration (Pagasa), ang maong bagyo adunay maximum sustained winds nga 105 kph duol sa mata niini ug may huyohoy nga moabot sa 135 kph niadtong Biyernes.

Gikabalak-ang moabot ang gikusgon sa hangin niini ugmang adlawa sa 235 kph sa pagsulod niini sa teritoryo sa Pilipinas.

Gimandoan sa NGCP nga i-activate ang tanang mga pasilidad sa NGCP gikan sa command center, regional center ug district centers sa nasud ilabi na niadtong mga dapit diin gibana-banang maoy agian sa maong bagyo ug kinahanglan bukas sila sulod 24-oras sa dili pa mosulod ang maong bagyo.

 Monitoron usab ang linya, susihon ang danyos, ug dalion ang rehabilitasyon ug pagpabalik sa linya sa kuryente samtang giandam na usab nila ang tanang mga kahimanan alang sa dinaliang repairs ilabi na ang ilang mga emergency restoration structures (ERS) nga gibutang na sa mga lugar nga dali ra kining magamit, samtang ang tanang scheduled maintenance works sa NGCP gipahunong una sugod karong adlawa. (BANAT NEWS)