Joavan, Barrido nagkauli

CEBU, Philippines - Ang kontrobersiyal nga sinagop sa mayor sa dakbayan sa Talisay nga si Joavan Fernandez ug iyang bata-bata nga mikiha kaniyang si Guillermina Barrido nagkauliay na sa maayong kabubut-on atol sa pista sa siyudad.

Si Kapitan Raul Cabañero sa barangay Bulacao, Talisay nga nahinabi sa Banat News kagahapon mibutyag nga niadtong Biyernes sa alas 4:00 sa hapon (atol sa pista sa Talisay) si Fernandez ug Barrido nag-atubang diha sa iyang buhatan sa barangay hall ug nagkasabot nga mag-uli na sa ilang maayong kabubut-on.

Matud ni Cabañero nga si Joavan mihimakak sa mga pasangil ni Barrido batok kaniya nga iyaha kining gihulga ug kini mihangyo ngadto kang Barrido nga mag-uliay na sila sa maayong kabubut-on.

Samtang si Barrido matud pa ni Cabañero wala usab magdikidiki sa hangyo sa iyang kanhi agalon tungod kay giingong gihasulan na kini sa iyang sitwasyon nga limitado ang iyang paglihok-lihok.

Si Cabañero maoy nahimong presiding officer sa maong husay ug nagpirmahanay nga gisaksihan nila ni Kagawad Vangie Abastillas ug SK Chairman Cashmer Araw-araw.

Si Barrido sa iyang bahin nga nahinabi kagahapon sa Banat News miangkon nga nagpinasayloay na sila ni Joavan ug nagdumili na kini og hatag pa og dugang pamahayag.

Si Barrido mipasangil kaniadto batok kang Joavan nga maoy tigsuplay og shabu sa Talisay ug may kakunsabo kining police woman sa Talisay ug usa ka agent sa Philippine Drug Enforcement Agency, pasangil nga gihimakak sa duha ka buhatan.

Si Supt. Henry Biñas, hepe sa Talisay City Police Station mihimakak sa pasangil nga iyang gimandoan si Barrido nga iduot si Joavan tungod kay naghatag kini og labad sa ulo.

Matud niini nga iyang gi-evaluate ang mga pamahayag ni Barrido dihang mianha kini sa iyang buhatan ug gikonsulta ngadto kang Talisay City Prosecutor Marshal Rubia ang gipasangil niini batok ni Joavan ug human niini ilaha kining gi-proteksyonan ug gipapuyo sa Cebu Provincial Police Office.

Si Joavan sa pakighinabi sa Banat News miangkong nalipay sa maong kalamboan. Matud pa niini sa text nga gipadala dinhi sa Banat News nga nalipay siya dihang kalit mibutho si Barrido sa ilang balay niadtong Biyernes.

Si Joavan mibutyag nga nakugang siya sa gihimo ni Barrido pero nagpasalamat usab siya tungod kay nalimpyohan ang iyang pangalan.

Sumala pa ni Joavan nga si Barrido mibutyag nga ang tanan niyang gipanulti batok niini “scripted” lang.

Si Santander dihang gikuhaan og pamahayag mitug-an sa Banat News nga dili siya makatuo sa pagpanghunaw karon ni Barrido ug ang pasangil niini kanilang mga opisyal kay dili sila daang kaila.

Si Digal sa iyang bahin mibutyag nga katungod ni Barrido nga mobutyag og susamang estorya ug wala siya’y mahimo niini kun mao na kana ang gitug-an ni Barrido. Matud pa niya kining pag-usab usab sa pamahayag ni Barrido maoy hinungdan nga iyaha kining gipaubos sa neurological test.   (BANAT NEWS)