Labella miawhag imbornal palimpyohan

CEBU, Philippines - Gihagit ni Konsehal Edgardo Labella ang Department of Engineering and Public Works (DEPW) sa siyudad nga paspasan ang paglimpiyo sa mga imbornal ug mga kanal aron kalikayan ang mga lunop sa mga kadalanan sa panahon nga kusog ang ulan. Gi-awhag usab sa konsehal ang publiko nga motabang sa pagpanghinlo sa ilang palibot. Gipahinumdom ni Labella nga usa sa mga paagi nga magpabilin ang kahinlo sa mga imbornal ug mga kanal mao ang paglikay sa paglabay og sagbot ug mga basura niini.

Gipasabot ni Labella nga kun mapundo ang mga basura sa kanal, mao kini makabara sa agianan sa tubig gikan sa uwan busa anha magsugod ang lunop sa usa ka lugar.

Nasayran nga ang pagdumdom sa uwan matag adlaw, molanat hangtod pa sa Disyembre busa kinahanglang ipabilin ang kalimpiyo sa komunidad. Samtang si Konsehal Nida Cabrera mapasalamaton kaayo sa pagsalmot sa nagkadaiyang sektor, mga opisyales sa barangay ug mga unibersidad alang sa maong programa sa siyudad. 

Giawhag usab sa   Cebu City River Management Council (CCRMC) ang publiko nga limpiyohan kanunay ang ilang palibot    ilabi na niadtong nagpuyo sa daplin sa sapa ilabi na ang anaa sa Guadalupe River nga naglatas-latas sa   nagkalainlaing barangay sa siyudad.  – BANAT NEWS