Leo Lastimosa mi-plead not guilty sa kaso

CEBU, Philippines - Mi-plead not guilty ang beteranong boardcaster ABS-CBN manager ug The Freeman ug Banat News columnist Leo Lastimosa atol sa arraignment sa iyang kaso kagahapon sa korte sa kasong libelo nga gipasaka ni Gov. Gwendolyn Garcia.

Kini may kalambigitan sa napatik nga lindog ni Lastimosa nga nag-ulohan "Si Doling Kawatan" nga gituohan sa gobernadora nga siya maoy buot gipasabot sa brodkaster.

Si Lastimosa wala moangkon sa maong kaso nga gipasaka sa gobernadora batok kaniya ug miila sa maong lakang nga usa lamang ka matang sa pagpangharas batok kaniya aron kini mahilom sa pagpangatake sa isyu sa Kapitolyo.

Si Lastimosa gikuyugan sa iyang abogado nga si Atty. Celso Espinosa sa arraignment niini sa sala ni RTC-7 Branch 15 Judge Rafael Yrastorza Sr.

Unang naabot si Lastimosa sa korte sa wala pa ang arraignment ug nakiglamano pa kini sa abogado sa gobernadora nga si Capitol Consultant on Information Atty. Rory Jon Sepulveda.

Sa pagpakighinabi sa mga sakop sa media, si Espinosa mitumbok nga kuli nang mahitabo nga may settlement sa maong kaso apan iyang gitataw nga wala nila sirad-i ang pultahan sa panagsabot sa kampo sa gobernadora.

Ang sunod nga hearing gikatakdang ipahigayon karong Nobiyembre 12, 2010. – BANAT NEWS