Mindanao rob-group niabot dinhi - Sr. Supt. Buenafe

CEBU, Philippines - Kapolisan sa dakbayan sa Sugbu mopahigpit sa ilang pagbantay gumikan sa report nga adunay nangabot nga grupo sa mga tulisan gikan sa Mindanao aron molusad og mga pagpanulis dinhi.

Mipagawas og kamanduan ang hepe sa kapulisan sa dakbayan nga si Sr. Supt. Ramon Melvin Buenafe sa onse ka police station sa dakbayan sa paghingusog sa ilang police visibility ug pagpatrolya ilabi na sa mga establisamento.

Base sa nadawat nga impormasyon ni Buenafe gikatahong grupo gikan sa Ozamis City ang mga nangabot nga mga tulisan.

Si Buenafe mimando sa mga sakop nga pahugtan ang ilang pagbantay ilabi na sa mga bangko, mga armored vehicles ug niadtong mga ‘soft targets’ kun sayon tulison nga mga establisamento.

Si Buenafe mitug-an nga sa pagkakaron daghan sa iyang mga sakop ang na-busy sa pagbantay sa mga opisyales sa nagkadaiyang nasud nga miyembro sa Asean nunot sa ilang tigom dinhi sa Sugbu.

Apan giklaro ni Buenafe nga iyahang gi-maximize ang ilang pulis sama sa pagpatrolya sa pipila ka mga lugar diin nahimutang ang mga dagkong establisamento sa siyudad.

Samtang si Chief Insp. Michael Anthony Bastes, hepe sa Fuente Police station maoy usa sa gimandoan sa pagpahugot sa ilang police patrols gumikan sa kadaghan sa mga bangko nga nasakop sa hurisdiksyon niini.

Masaligon hinuon si Buenafe nga ang maong grupo sa tulisan gikan sa Mindanao mahadlok nang manulis dinhi sa dakbayan sanglit niadtong Lunes sa gabii diha sa barangay Sambag 2 napusilan ni PO3 Osorio Ramiso Jr. ang duha ka tulisan nga sila si Alberto Torregosa ug Shyrill Ostea sa pakyas nga pagtulis sa usa ka lending firm.

Si Torregosa kinsa maoy lider sa Torregosa’s robbery group didto sa Bohol nahibaw-an sa kapulisan nga ang Danao, Bohol mipatong og P50 mil sa ulo niini human nag-atubang usab og daghang kaso sa pagpanulis didto sa maong probinsya. – BANAT NEWS