'Ex-con' gipatay

CEBU, Philippines - Patay ang usa ka giingong ex-convict ug naangol ang usa ka 62-anyos nga lola human gipamusil sa duha ka nagmotor nga mga lalaki diha sa Mother Ignacia Village sa barangay Polpogan lungsod sa Consolacion kagahapon sa ala 1:00 sa kaadlawon.

Ang biktima nga patay nang nadangat sa tambalanan mao si Dennis Mahilum, gisusi pa sa kapolisan ang report nga bag-ohay lang kining nakagawas sa bilanggoan ug molupyo sa nahisgutang lugar, samtang naangol ang silingan niining si Nicanora Villagonzalo, 62. Matud ni PO1 Adonis Terania sa Consolacion Police dihang nahinabi sa Banat News ang biktima diha sa daplin sa dalan dihang gihunongan sa duol sa mga gikatahapan ug gipusil makadaghang higayun gamit ang automatic .9mm pistol. Ang biktima nga nakaangkon og mga samad pinusilan sa lawas daling gidala sa Eversley Child Sanitarium Hospital sa Jagobiao siyudad sa Mandaue apan gideklarar nga dead on arrival.

Apan nasuta human sa hitabo nga napagan si Villagonzalo kinsa naatol nga nahiagi sa maong dapit ug naigo sa walang bahin sa paa ug gidala sa Vicente Sotto Memorial Hospital.

Ang kapulisan naka-recover og 14 ka mga kabhang sa bala sa .9mm pistol ug laing upat ka deformed slug diha sa crime scene, wala pay ideya ang kapolisan sa motibo sa maong krimen. – BANAT NEWS