CEBU, Philippines - Most wanted ug lider sa grupo sa tulisan ang usa sa duha ka tulisan nga napusilan sa pulis atol sa pinusilay human sa pakyas nga pagtulis nila sa lending firm niadtong Lunes sa gabii diha sa dalan Uytengsu sa barangay Sambag 2.
Si Sr. Insp. Bonifacio Garciano, hepe sa Theft and Robbery Section nga nahinabi sa Banat News mitug-an nga si Alberto Aniedez Torregosa nga taga Magtangtang Danao, Bohol maoy lider sa Torregosa Robbery Group nga nagbase sa lalawigan sa Bohol.
Giingong sila mga kanhi sakop ni Meloy Garcia Robbery Group nga nakapanulis na dinhi sa dakbayan. Si Garcia nabilanggo na didto sa Bohol.
Matud ni Garciano nga duna silay nadawat nga report nga dunay reward nga P50 mil sa Danao, Bohol si Torregosa gumikan gihapon sa kasong pagpanulis.
Si Torregosa padayon pang giatiman sa mga doktor diha sa Cebu City Medical Center kauban nga giatiman si Shyrill Ostea kinsa kauban niyang napusilan ni PO3 Osorio Ramiso Jr. – BANAT NEWS