Vidal andam magpabilanggo

CEBU, Philippines - Giawhag ni Cebu Archbishop Ricardo Cardinal Vidal ang publiko sa pagpaluyo sa kawsa sa Simbahan aron pugngan ang pagpasar sa kongreso sa Reproductive Health Bill.

Gani atol sa panamilit nga Santos nga Misa sa Our Lady of Fatima of Portugal niadtong Miyerkules sa gabii diha sa Cebu City Sports Complex daghan ang miuyon sa panawagan ni Vidal nga supakon ang maong balaudnon.

Matud pang Vidal siya maoy manguna sa mga lihok protesta batok sa maong balaudnon ug andam kining maoy unang masulod sa bilanggoan aron lang ipakita ang iyang kusganong pagsupak.

Gisupak sa Simbahan ang maong balaudnon gumikan sa mga probisyong giingong nag-promote og artificial birth control ginamit ang mga contraceptives nga supak sa pagtulun-an sa Simbahan.

Si Vidal nagkanayon nga may pipila ka probisyon sa RH bill nga nagdili sa paghisgot o pagsaway batok sa programa sa maong balaudnon ug ingon man nagdili sa mga tawong buot mopugong sa mga magtiayon paggamit og contraceptives.

Sumala pang Vidal kun ingon niini ang maong balaudnon daw mawagtangan na og trabaho ang kaparian sanglit dili naman sila mahimong makahatag og pahimangno sa katawhan.

Ang cardinal mipadayag sa iyang kabalaka nga sa higayon nga mapasar ang maong balaudnon hayan magbaha ang mga condoms ug uban pang mga matang sa contraceptives sa mga kabarangayan lukop nasud.

Gipadayag usab sa cardinal ang iyang kadismaya sa nagpadayon nga debate sa RH bill sa kongreso nga naghisgot sa dolyares nga pundo alang sa katumanan niining programa apan wala gyud mahisguti ang moralidad sa pagpatuman sa maong balaudnon. – BANAT NEWS