Daghang mediamen ang mikandidato

CEBU, Philippines - Pipila ka mga sakop sa media sa dakbayan sa Sugbo ug sa ubang parte sa lalawigan ang magpapili sa nagsingabot na nga Barangay ug Sangguniang Kabataan Election karong Oktubre 25.

Ang uban kanila mga kanhi opisyal sa barangay ug buot magpapili samtang ang uban nangaparot ug gustong suwayan og balik ang bugnong lugaynon apan ang uban mga bagito pa lamang.

Nakasang-at na sa ilang Certificates of Candidacy naglangkob nila ni DySS reporter sa Gabriel Bonjoc kinsa magpasubli sa iyang ikaduhang termino isip konsehal sa ilang barangay sa Talisay City, samtang molansar usab sa pagkabarangay kagawad sa ilang barangay sa dakbayan sa Sugbo sila si Banat News managing editor John Rey Saavedra ug DyHP reporter Elly Bolonos.

Magpapili usab og balik pagka-kapitan sa iyang barangay ang reporter nga si Joseph “Joy” Tumulak ug modagan pagka-kagawad ang kauban niya sa buhat nga si Vincie Monterde.

Samtang si Liv Campo sa The Freeman mosuway pagsulod sa natad sa politika diha sa iyang barangay sa mao gihapong dakbayan.

Magpasubli usab pagbalik pagka-kapitan ang DyAB reporter nga si Dave Tumulak, DySS reporter Alan Mahait ug ABS-CBN reporter nga si Ramil Ayuman.“Balanse lang gud sa oras ang importante, sa media naka-serbisyo ta sa atong isig ka tawo, sama ra gihapon nga miserbisyo ta sa mga tawo sa atong barangay,” nagkanayon si Mahait.

Gawas sa nahisgutang media personalities, mosang-at usab sa iyang COC ugmang adlawa ang news anchor sa DyHP nga si Bernie Cabusao kinsa magpapili pagka-kagawad sa ilang barangay.  – BANAT NEWS