Bata nadasmagan sa ambulansya angol

CEBU, Philippines - Usa ka wala hiilhing bata nga mikalit og labang sa karsada nadasmagan sa usa ka ambulansya didto sa national highway sa barangay Sabang, lungsod sa Sibonga sa miaging hapon.

Ang biktima nga usa ka lalaki gibanabanang nagpangidaron og ll anyos, samtang ang drayber sa   ambulansya nga nakadasmag nailhan nga si Angelito Serencio, 40, nga taga barangay Poblacion, lungsod sa Santander.

Sa pakighinabi sa Banat News ni SPO4 Rodelito Carrillo mibutyag nga ang ambulansya nga naghatod og pasyente gikan pa sa lungsod sa Santander padulong sa syudad sa Sugbo dihang pag-abot sa barangay Sabang kalit nga milabang ang biktima.

Ang drayber nga nakalitan mikalit og tunob sa preno apan mipadayon gyud sa pag-aginod ang sakyanan hangtod nga nasabak ang biktima ug nalagpot.

Gikarga dayon sa drayber ang maong bata ug gidala sa Vicente Sotto Memorial Hospital samtang ang maong drayber mitahan usab dayon sa iyang kaugalingon ngadto sa kapolisan.