CEBU, Philippines - Angol ang usa ka konduktor sa PUJ human kini pusila sa wala hiilhing kriminal didto sa karaang terminal sa dalan Punta Rizal, barangay Pajo, dakbayan sa Lapulapu sa miaging tungang gabii.
Ang biktima mao si Reynan Ypanto, 21, ulitawo nga taga lungsod sa Tabugon apan temporaryong nagpuyo didto sa Pajo.
Si SPO1 Jonard Cinco sa homicide section sa kapolisan sa Lapulapu mibutyag nga gikan nga nagkanta-kanta sa videokihan ang biktima dihang migawas kini kay magpalit og sigarilyo apan nasugatan niya ang duha ka wala hiilhing lalaki nga maoy mipusil kaniya.
Human masabak ang biktima dali kaayong nanibat ang duha, samtang ang biktima gihatod dayon sa Vicente Sotto Memorial Medical Center sa dakbayan sa Sugbo. Gipangita na sa kapolisan ang mga kriminal. – BANAT NEWS