Duha ka lalaki gipusil angol sa kontra

CEBU, Philippines - Duha ka lalaki ang napusilan sa kontra nilang pundok atol sa usa ka engkuwentro didto sa dalan Juana Osmeña, barangay Camputhaw ning dakbayan sa Sugbo kagahapon sa alas 3:00 sa kaadlawon.

Ang mga biktima mao sila si Kervin Arcenal, 18, nga taga barangay Hipodromo ug Elbert Tampus, 20 nga taga sitio Kamagong, barangay Lahug, ang tanan ning dakbayan sa Sugbo.

Usa sa mga namusil nga nadakpan nailhan nga si Alexander Bacus, 26, nga taga Campo 2, sa dakbayan sa Talisay kinsa nasikop sa mga sakop sa Tracker nga sakop sa Fuente Police station nga gipakatap diha sa nahisgutang lugar.

Nasakmit gikan sa suspetsado mao ang .22 derringer magnum revolver nga may mga buhing bala.

Si SPO2 Augustin Collano sa Fuente Police station nagkanayon ang mga batan-on diha sulod sa diskohan sa Pump disko nga nahimutang sa nahisgutang lugar.

Dihang nagkainitay ang grupo sa mga biktima ug grupo sa suspek, nanggawas kini sa diskohan ug didto na mag- engkuwentro sa gawas diin samdan si Arcenal sa tuong pulso, samtang nabukobuko usab si Tampus.

Padayon pang gipangita sa kapolisan ang uban pang sakop sa grupo nga nakapusil. – BANAT NEWS