2 ka balay ugdaw

CEBU, Philippines - Duha ka mga balay ang hingpit nga naugdaw og laing usa ang igo lang nakan-an sa kayo sa sunog nga nahitabo didto sa Sityo Planta barangay Poblacion sa siyudad sa Toledo niadtong Martes sa alas 2:45 sa hapon.

Ang na-abo nga mga balay gipanag-iya nila ni Leebi Barbon ug Analyn Omania, pulos hingkod, samtang ang igo lang nakan-an sa kayo gipanag-iya ni Nestor Castro.

Si SFOI Leonardo Clarido sa Toledo City Fire Department mibutyag sa Banat News nga nadawat nila ang alarma sa sunog alas 2:45 sa hapon ug napawong usab dayon paglabay sa 5 minutos.

Gibana-banang mokabat og P40 mil ang kinatibuk-ang danyos gumikan kay ginama lang sa mga baratohong materyales.

Sa paghimo ning balita padayon pang gi-imbistigar sa kabomberohan ang hinungdan sa maong sunog nga nagsugod sa pinuy-anan ni Barbon.

Way gika-report nga nakalas o naangol atol sa maong nahitabong sunog. – BANAT NEWS