Mamiktima og boarding houses nadakpan

CEBU, Philippines - Giilang notadong kawatan dinhi sa dakbayan kansang modus operandi moabang og mga boarding house aron siya makabiktima sa iyang ka-boardmates nasikop na gyud sa kapulisan kagahapon sa buntag. Ang labing demalas kay nakuhaan pa gyud og usa ka paketeng gidudahang shabu ug gamit sa paghingos niini si Maria Lorwena Avila Lunas, residente sa dalan D. Jakosalem sa barangay Day-as ning dakbayan. Sa report sa Theft and Robbery Section (TRS) sa Cebu City Police Office pasado alas-10 kagahapon sa buntag si PO3 Juvee Tantiado Jr. nga nadestino sa Cebu City Police Office paingon sa Cebu City Sports Complex alang sa iyang schedule sa PFT (Physical Fitness Test) dihang iyang nakit-an ang suspek nga naglakaw sa maong lugar hinungdan nangayo siya’g backup.

Sila si PO2 Justino Paragados ug SPO1 Michael Ernie pulos sakop sa TRS miresponde ug ilang nakit-an si Lunas nga dunay gilabay nga plastic sa junk food pagkakita kanila.

Tungod niini gipunit kini ni Ernie ug nasutang usa ka paketeng gidudahang may sulod nga shabu ang sulod niini hinungdan nga ilahang gisikop si Lunas. Si Sr. Insp. Bonifacio Garciano, hepe sa TRS nanawagan sa mga nabiktima ni Lunas nga moanha sa ilang buhatan aron ilhon ang suspetsado.

Si Jezza Alejandrino 17, tinun-an sa nursing sa usa ka unibersidad sa dakbayan ug kasamtangan nag-abang diha sa Nasipit Talamban, mitug-an sa mga tigbalita nga niadtong Septiyembre 23 sa udto gikawat sa suspek ang iyang laptop, P10 mil nga cash hard disk, DSLR camera, kwintas ug singsing.

Gisaysay sa biktima nga niadtong Septiyembre 23 sa buntag gipahibawo nalang siya sa iyang landlady nga duna na siyay kauban sa kwarto nga usa ka babaye kinsa nagpailang si Gina Restituto nga taga Ormoc nga mao usab si Lunas.

Matud pa niya human sa iyang klase ug sa iyang pag-uli wala na si Lunas ug iyang mga butang. – BANAT NEWS