CEBU, Philippines - Giplano sa kagamhanan sa dakbayan sa Mandaue ang pagpalambo sa Bantayan sa Hari nga nahimutang sa ilawom sa 1st Mactan Mandaue Bridge sa barangay Looc nunot usab sa tinguha sa National Commission on Culture and Arts (NCCA).
Si Father Harold Rentoria nga maoy direktor sa NCCA maoy mitanyag sa ilang dakong mahimo ning maong katuyoan atol sa ilang pagbisita sa maong lugar sa miaging adlaw kuyog sa grupo sa mga batan-on dinhi sa nasud.
Si Father Rentoria miingon nga nalakip karon sa mga programa sa ilang buhatan ang pagtabang sa mga lokal nga kagamhanan sa nasud sa pagpreserbar sa mga makasaysayanon niining lugar nga magsilbing tourist destination.
Gitataw niya nga ang ilang pagbisita sa Bantayan sa Hari maoy kabahin sa pagpangandam sa pagduaw sa Galleon Trade sa maong dakbayan aron banhawon ang mga panghitabo niadtong 1565 hangtod 1815.
Dugang pa niya nga maoy ilang pagtuo nga ang Bantayan sa Hari gitukod sa mga lumad niadtong 1800 isip watch tower sa modunggo nga Galleon Trade sa maong dapit sa maong mga katuigan.
Sa nasayran ang Bantayan sa Hari maoy nahimong landmark sa Mandaue busa nalakip kini sa desinyo sa silyo sa dakbayan. - BANAT NEWS