COMELEC mitambag sa mga kandidato

CEBU, Philippines - Gipahimangnoan sa Commission on Elections acting regional director Veronico Petalcorin ang tanang mokandidato sa nagsingabot nga Barangay ug Sangguniang Kabataan elections sa Oktubre 25 nga ipaagi sa limpiyong ‘duwa’ ang ilang pagsalmot aron malikayan ang mga kagubot.

Matud pa ni Petalcorin nga dunay ubang badlungon nga mga kandidato nga kusog kaayong mobuhat og vote-buying busa hingpit ang ilang pagpaniid niini aron masumpo ang maong problema ug ang Philippine National Police maoy usa sa gitahasan pag-monitor kanila.

Gitambagan usab ni Petalcorin kadtong mokandidato pagka-SK nga dili mamayad sa ilang mga botante isip mga kabataan tungod kay dili kini maayong imahe kanila.

“Samtang bata pa sila, kinahanglan nga sakto na gyud ang ilang buhaton, dili sila kinahanglan nga mamayad sa ilang mga botante. Lain kaayo paminawon nga sa ilang pangidaron, mobuhat na sila og dili maayo,” nagkanayon si Petalcorin.

Ugma na magsugod ang opisyal nga campaign period ug   kinahanglang 2 feet by 3 feet ang sukod sa ilang mga posters.

Samtang ang mga dagkong streamer sa kandidato kay mahimo lang nga gamiton sa ilang mga political rally sama sa opening salvo ug sa miting de avanse sa mga kandidato. - BANAT NEWS