Pangandamsa kalag-kalag gisugdan

CEBU, Philippines - Gisugdan na ni Mayor Michael Rama ang panagtigom alang sa pagpangandam sa umaabot nga kalag-kalag.

Gitahasan ni Rama ang Cebu City Police Office sa paglusad na sa Oplan Kalag-kalag aron sayo nga mapangandaman ang seguridad sa mga sam-ang aron malikayan ang mga kagubot.

“Pangandaman gyud na nato, kay gusto nato nga iselebrar ang maong okasyon sa hapsay nga pamaagi. Importante kaayo nga maseguro ang seguridad sa mga tawo pagduaw nila sa sementeryo,” nagkanayon si Rama. Awhagon usab sa mayor ang mga opisyales sa barangay aron mabutangan usab og mga tanod ang mga sam-ang aron pag-abag sa kapulisan.

Dugang usab niya nga dako usab kaayo nga matampo ang City Traffic Operations Management sa pagpahapsay sa dagan sa trapiko aron dili mahasol ang mga tawo sa pagduaw nila sa mga sam-ang sa mga minahal nila sa kinabuhi.

Adunay 23 ka mga sam-ang ang dakbayan ug pipila niini mao ang labing dagko sama sa sam-ang sa Calamba, Pardo, Carreta, Queen City Garden Cemetery ug uban pa. Sumala pa sa mayor nga sa Oktubre 31 pa lang kinahanglang plastada na ang tanan, aduna gihapoy ibutang nga command centers sa mga sam-ang. (BANATNEWS)